Minister Finans, Planifikasyon Nasyonal ek Komers pe fer rapel tou bann benefisyer anba sa Progranm Tanporer kot bann ki saler ti pli ba ti pe ganny en sipor finansyel avek Gouvernman, ki sa progranm in fermen depi le 31 Mars.
Parkont, kliyan Lazans Proteksyon Sosyal (ASP), ki anba sa progranm ti pe benefisye pou kontinyen resevwar selman sa peyman finansyel, me pa sa sipor adisyonel pour elektrisite.
Kliyan ASP ki pe kontinyen resevwar sa sipor finansyel i bann ki resevwar Benefis Retret, Benefis Envalidite e Benefis Dezabilite.
Antretan, ASP pe enform sa bann benefisyer ki peyman pour sa siplemanter in konmanse depi le 26 e pou ale ziska le 29 Avril.
I enportan pou note ki kriter pou kalifye pour sa peyman siplemanter i reste parey ti ete anba Progranm Tanporer pou siport bann ki saler i pli ba.
Nouvo kliyan anba sa trwa progranm i osi kapab kalifye dapre kriter an plas.
Si ou ti pe benefisye anba sa progranm oparavan e i annan okenn sanzman dan nivo peyman, silvouple kontakte ASP atraver Telefonn: 4293547, 4293548, 4293500
Silvouple annan ou nimero Kart Idantite e detay lo sanzman dan ou nivo peyman.