Ozordi, le 17 Out, ti dernyen zour pour bann dimoun ki travay dan sekter prive ki zot saler i par anba R9,000, e tou dimoun ki osi tonm dan sa kategori ki oule benefisye avek sa lasistans adisyonel R300 pour elektrisite, pou al anrezistre e pou etabli si zot kalifye pour peyman pou mwan Zilyet ek Out.
Sa legzersis pe fer anba progranm Tanporer Gouvernman pou siport bann ki saler i pli ba.
Apre ozordi, sa lalis pou fermen, pour ki verifikasyon e koreksyon neseser i fer, avan peyman i ganny fer. Sa premye peyman i ekspekte ganny fer lafen sa mwan. Pour sa premye peyman, bann ki kalifye pou resevwar en ‘backpay’ pour mwan Zilyet e osi zot peyman pour mwan Out.
Tou nouvo lanrezistreman ki ganny fer aparti semenn prosen pou ganny evalye avan peyman i ganny fer lafen Septanm.
En dimoun ki kalifye anba sa progranm i bezwen anrezistre zis en fwa, amwen i annan sanzman dan son kondisyon lanplwa.
Manm piblik ki kalifye anba sa progranm, pe ganny demande pou anmenn avek zot: Kart Idantite Nasyonal ki valid, zot dernyen ‘pay slip’, e zot kart Labank ki annan tou zot detay. Pour bann ki pe vin anrezistre pour sa siport adisyonel pour elektrisite, zot bezwen anmenn avek zot sa bann dokiman ki’n mansyonnen anler, e osi zot dernyen bil elektrik.