Lanrezistreman pour travayer dan sekter prive ki dan lanplwa formel pou benefisye avek sa lasistans saler, e pour tou dimoun ki kalifye pou ganny sa sipor adisyonel pour kouran in konmanse ozordi, Mardi le 26 Zilyet.
Tou lanrezistreman pe fer dan Biro Ladministrasyon Distrik.
Fodre note, ki i annan bann zour spesifik pour sa legzersis lanrezistreman.
Pour sa de premye semenn, lanrezistreman pou fer dan Mardi, ek Merkredi, ant 10er bomaten ziska 6er diswar, e dan Sanmdi ant 9er bomaten ziska 1er apremidi.
Pour semenn ki konmans aparti le 08 Out, lanrezistreman pou fer SELMAN dan Mardi ek Merkredi, ant 10er bomaten ziska 6er diswar.
Manm piblik pe ganny demande pou anmenn avek zot sa bann dokiman swivan: Kart Idantite Nasyonal oubyen paspor ki valid. Zot ‘payslip’ ki date pa pli boner ki Zen 2022, e zot kart labank ki annan tou zot detay lo la.
Pour sa sipor adisyonel R300 pour bil kouran, apard ki sa bann Dokiman mansyonnen anler, ou pou bezwen anmenn osi sa bil, date pa pli boner ki Zen 2022, ki adrese lo ou non, parkont, si bil dan sa lakour pa lo ou non, me ou ki peye, fer sonmet sa bil sinny sa bil e anmenn avek ou, son kart idantite ki valid.
Si ou pe lwe lakaz, me ou ki pey bil kouran, fer ou ‘landlord’ ki bil i lo son non, pou sinny sa bil, e anmenn avek ou, ou kontra lwe lakaz ki valid.
Si bil kouran i lo non en dimoun kin mor, silvouple al kot PUC pou fer le neseser pou transfer sa bil lo ou non.
Pour ou kalifye, pour sa Lasistans Tanporer ki gouvernman pe donnen, fodre ki ou saler pa desot R9,000.
Pour okenn klarifikasyon, ou kapab telefonn ‘Hotline’ 190, oubyen pran kontak avek nou lo email: TGMSenquiries@gov.sc