Ozordi i lokazyon pou gouvernman anons bann prensip ki pou gid reform dan taks.

Reform dan taks i form parti 2enm zenerasyon reform ki swiv bann reform lo nivo makro-ekonomik. Reform dan taks i neseser akoz si nou pa fer li nou pou perdi tou benefis ki reform makro-ekonomik pe prodwir. Reform taks i tre enportan pou sa nouvo sistenm ekonomik ki nou pe etablir. Sa reform taks pou enn ki re fondamantal.

Lobzektif prensipal reform dans taks se pou elarzir baz taks ki a permet bokou plis biznes pey taks, redwir taks rate avek enn ki senp e inifye.

Bann prensip ki pou gid sa reform dan taks i swivan:

• Fer ki sistenm taks i enn ki zis e ekitab

• Fer laplenn vin nivo

• Met anplas en kad lezislatif ki stab e dirab avek bi promouvar lenvestisman lokal e etranzer

Reform dan taks pou ganny fer lo en period 3 an. Sa i an linny avek plan mwayen ternm ekonomik ki gouvernman pou donn detay alokazyon prezantasyon bidze 2010.

Gouvernman in angaz li dan en dyalog avek bann partner. I annan plizyer sesyon travay kin ganny progranmen pou sa lannen. Gouvernman pe donn notis boner. Gouvernman pe kominik boner.

Avek bi fer laplenn vin nivo i neseser ki nou adres bann konsesyon e bann ekzanmpsyon. Sa i en latas ki konpleks me ki enportan ki nou antrepran. Nou pou fer li atraver lentrodiksyon en nouvo kod taks ki pou ganny entrodwir apartir Zanvye 2010. Tou konsesyon anba plizyer lalwa, tel ki TIA pou annan en limit ziska Zilyet 2010. Nou annan en tim profesyonel ki pou antrepran diskisyon lo sa size.

Rate 40% business tak i tro o. Nou pou fer li desann apartir Zanvye 2010. Sa i lenstriman pou fer sir ki nou elarzir baz taks e ogmant self- compliance (set-a-dir, kot mazorite i pey taks san ki lotorite taks i bezwen deryer zot).

Pou fer laplenn vin nivo i neseser ki bann biznes ki annan en laysens spesyal koman enportater e ki baze dan “import zone”, zot kondisyon i egal a bann enportater domestik. Se pou sela ki zot konsesyon pou ganny retire apartir zilyet 2010.

Nou pou elimin retail-mark up dan kalkilasyon GST an zanvye 2010 e apartir zanvye 2012 nou pou met anplas en sistenm GST ki pli kopreansiv e modern. En sistenm GST baze lo prensip VAT. Set-a-dir en taks ki baze lo en % ou lavant me ki anmenmtan permet ou fer en claim lo bann taks ki oun deza peye.

Sistenm sekirite sosyal pou reste avek bi fer bann peyman benefis tel parey i leka ozordi. Sof, nou pou entrodwir en “personal income tax” ki pou ranplas kontribisyon sekirite sosyal ki sak anplwaye e anplwayer i fer. Parey i le ka ozordi se anplwayer ki pou remet peyman “personal income tax” lo lapar anplwaye. Lentrodisksyon “personal income tax” apartir zilyet 2010 pa pou afekte saler okenn travayer. Nou pou pas lalwa neseser ki pou garanti sa.

Reform taks ki nou pou antreprann i enn ki konpleks. I annan plizyer laspe teknik e legal.

Dan sa travay nou pou ganny sipor nou bann partner. Tel parey in leka, nou pou diskit bann proze delwa ki gouvern sa nouvo sistenm taks ki nou pou kree.

Ofir ki nou progrese nou pou kontinye kominike avek bi gard nou pep okouran.

Avek bidze 2010 nou pou donn detay lo bann mezir ki pou antre anviger.